Nadunor ti maysa a lalaki gapu iti panangbagkong ti inaudi a kabsatna idiay Barangay Macatcatud, Magsingal, Ilocos Sur idi rabii, March 21, 2026.
Ti biktima ket agtawen iti tallopulo ket innem, naasawaan ken driver idinto a ti kabsatna a suspek ket agtawen iti duapulo ket pito, addaan iti live-in partner nga agnaed iti nasao a lugar.
Nagresponde dagiti pannakabagi ti linteg iti pakaammo nga adda napasamak a pammagkong iti nasao a lugar ngem idi nakadanonda ket naipanen ti biktima iti Ilocos Sur District Hospital – Magsingal idinto a ti suspek ket kinemmeg dagiti kabagyanna.
Nammoan nga agin-inom ti biktima ken suspek kaduada ti amada ken maysa pay a kabsatna ngem kellaat nga adda saan a nagkinnaawatan ti suspek ken ti maysa pay a kabsatda a gappuanan iti panagdinnanogda.
Inanawa ti biktima dagiti dua ngem isu metten iti panangbagkong kenkuana ti suspek iti namin-ano a daras a gappuanan ti panagsagabana iti multiple stab wounds isu a dagus nga impan dagiti kabagyanna iti Ilocos Sur District Hospital – Magsingal para iti pannakatamingna.
Kinemmeg dagiti otoridad ti suspek nga ita ket addan iti kustodiya iti Magsingal Municipal Police Station.
