Imbilin ni Presidente Ferdinand Marcos Jr. kadagiti maseknan nga ahensia ti gobierno a siguradoen a patas ti distribution ti tulong para iti amin a naapektaran ti tension idiay Middle East.
Segun ken ni Presidential Communications Office (PCO) Undersecretary ken Palace Press Officer Claire Castro, indauloan ni Presidente Marcos ti maikatlo a taripnong ti Unified Package for Livelihoods, Industry, Food, and Transport (UPLIFT) Committee, kadua ti mangidadaulo ti agduduma nga ahensia.
Ti bilin ni Marcos iti UPLIFT Committee ket siguradoen a maipaay ti amin a maapektaran ken kitaen ti equal distribution ti tulong a maited kadagiti agkasapulan.
Pinasingkedan ni Castro nga imbilin pay ti presidente dagiti miembro ti komite a mangidatag ti napaot a solusion kadagiti parikut kangrunaan iti patangan ti suplay ti langis ken gasolina ti pagilian.
