Nagpositibo ti drug test ken dagiti naala a shabu manipod ti maysa a lalaki a nagprobokar idiay Barangay Namnama, Sinait.
Ti suspek ket agtawen iti uppat a pulo ket walo nga agnaed iti nasao nga ili.
Iti pannaki-uman ti Bombo Radyo Vigan ken ni PLt. Elmer Asistin a Deputy Chief of Police iti Sinait Municipal Police Station, nakaawatda ti tawag maipanggep ti panagprobokar ti suspek isu a nagrespondeda ket nadanon dagiti polis iti panagbettakna iti botelya, panagpuor iti bambanag iti igid iti pagtaenganna, panangriribok iti karrubana ken nakitada pay a naka-iggem iti buneng.
Segun ken ni Asistin, naglibas pay laeng idi immuna ti suspek ngem naisayangkat iti hot pursuit operation a gappuanan iti pannakakemmegna iti pagtaenganna ken naala kenkuana iti shabu nga agdagsen iti 0.2 a gramo ken aggatad iti P1,360.
Naammoan a pasaray maka-inom iti arak ti suspek ken mapapati a naka-usar iti maiparit nga agas a gappuanan iti panangpanaw kenkuanan dagiti putotna.
Iti agdama ket nakakustodiyan kadagiti pannakabagi ti linteg ti suspek tapno dumalan iti husto a proseso.
