Impakaammo ti Philippine National Police (PNP) a nasurok 16,000 a tattao iti nakemmegda ken nasurok P11 billion a gatad iti ilegal a droga ti naala dagiti otoridad ti umuna a tallo a bulan idi 2026.
Segun ti PNP, nakaisayangkatda iti 14,550 nga anti-narcotics operations manipod January 1 agingga March 30 a nagresulta iti pannakakemmeg iti 16,784 nga indibidual iti intero a pagilian.
Karaman kadagiti naala nga illegal drugs iti 619.82 a kilo iti shabu; 2,800 a kilo iti napagango a bulong iti marijuana; 619,820 a mula a marijuana; 1,816 a kilo iti cocaine; 166 a kilo iti ecstacy; ken nasurok 4,000 a kilo iti kush wenno high-grade marijuana.
Kinuna ti PNP nga umabot iti nasurok P11 billion ti pakabuklan a gatad dagiti nasao a kontrabando.
Pinasingkedan ni PNP Chief Jose Melencio Nartatez Jr. nga itultuloyda iti bloodless campaign a nakatulok iti panangisayangkat kadagiti operasyon a mangsalaknib iti komunidad bayat a mairesrespeto iti human rights.
