Kinarit ni Senador Risa Hontiveros dagiti agasawa a Discaya nga idatag ken ipasa iti Senado ti amin a records nga iggem-da mainaig iti flood control projects ken dadduma pay idi panawen ti administrasion ni dati a Presidente Rodrigo Duterte.
Pinasingkedan ni Hontiveros a no kayat dagiti agasawa a da Curlee ken Sarah Discaya a makitinnulong kadagiti otoridad ket ipasa da iti flood control project records manipud tawen 2016 agingga 2022.
Iti naudi a panagdengngeg ti Senate Blue Ribbon Committee, inreklamo ni Curlee Discaya ti maaw-awagan a “modern-day robbery” kalpasan a pagisublyenda ti ill-gotten money kas paset ti aplikasion ti Witness Protection Program.
Ngem impaganetget ni Hontiveros a saan nga agpammarang a “biktima” dagiti agasawa ken saan da nga iyaleng-aleng ti bilin ti Senado. Reynand Fontejon
