Kalikagum dagiti Pilipino idiay Malaysia a maaddaan iti gundaway ni President Ferdinand Marcos Jr. a makisinnaranak iti Filipino Community iti nasao a pagilian.
Dayta ket kagiddan ti idadar-ay ni Pres. Marcos iti 47th ASEAN Summit and Related Summits idiay Kuala Lumpur, Malaysia.
Iti pannaki-uman ti Bombo Radyo Vigan ken ni Bombo International News Correspondent Lynn Tabilang Espejo nga agtrabtrabaho idiay Malaysia, namnamaenda a makipagkita ni Pres. Marcos kadagiti Pilipino ta agingga October 28 pay isuna iti nasao a pagilian.
Segun ken ni Espejo, ti addang ket tapno maibuksilan dagiti Pilipino dagiti kalikagum ken kiddawda iti presidente nangruna iti panangtulong kadagiti Pilipino nga agtaltalinaed iti Overseas Workers Welfare Administration (OWWA) office gapu iti agduduma a rason tapno makaawiddan iti pagilian nangruna ita nga umadanin iti paskua.
Kinunana a dagiti nasao a Pilipino nga adda iti opisina ket kaaddoan ket naabuso ken pimmanaw kadagiti amoda ngem awan iti naan-anay a dokumentoda tapno agsubli iti pagilian.
Maipalagip a nagturong ti presidente idiay Malaysia para iti 46th ASEAN Summit ngem saan a naikkan iti gundaway a nakisinnarak kadagiti Pilipino.
