Dua a balasitang a dandani nalmes iti kabaybayan idiay San Pedro, Vigan City, Ilocos Sur iti insalakan dagiti dua a lallaki nga agindeg idi nasao a barangay.
Iti pannaki-uman ti Bombo Radyo Vigan ken ni Ruben Agapinan, apaman a nagsardeng iti tudo idi kalman, June 3, 2025 iti alas kuatro y media iti malem ket nagturongda iti kabaybayan ken ni Laurino Ablog Jr. tapno mapan kitaen ti bilogda ngem isun ti pannakitada kadagiti dua a malmalmes isu a saanda a nagdudua a napan nagarayat.
Segun ken ni Agapinan dagiti biktima ket saan nga agnaed iti probinsia nu diketdi taga-Baguio City da ta pimmasyarda laeng ket waloda amin a napan iti kabaybayan.
VIDEO – RUBEN AGAPINAN
Pinasingkedan met ni Laurino Ablog a maysa a tanod iti nasao a barangay, apaman a nakasangpetda ken ni Agapinan ket kellaat nga immasideg ti maysa a lalaki a kadua dagiti biktima ket nagpaarayat kadakuada isu a tinulonganda.
Kinuna ni Ablog a narigat iti panangalawda kadagiti dua ta nauneg iti nakalmesanda a paset ken arigna mairaremda nu ibagkatda ida isu a tinenggelda laeng dagitoy.
Apaman a naiya-onda dagiti dua ket nagsinnublat a nga in-CPR ni Ablog ida ta dimmalan iti panagsanay idi kallabes a banag nga in-apply na kadakuada.
Inladawanna dagiti biktima nga awan ti puotda, agmaris ube iti kulay ti rupada, agpupuraw iti bibigda ken agruaren ti danum ti ngiwatda ngem saanda a simmuko a nangisalbar kadagitoy.
Pagyamanna ta kalpasan iti sumagmamano a minutos ket naaddaan met laeng dagiti biktima iti puot isu a naglag-an iti riknada a nakatulong ti padada a tao.
VIDEO – BRGY TANOD LAURINO ABLOG
Kabayatanna, iti biang ni Barangay Captain Dominador Magno iti San Pedro, Vigan City, siwawaya dagiti umili ken bisita a mapan iti lugarda nga agpasyar ngem kiddawna a nu nadawel wenno napegges iti danum ti kabaybayan ken nu natudo iti panniempo ket nasaysayaat a saanda nga agdidigos tapno maliklikan iti pannakalmes wenno aniaman nga insidente a posible a mapasamak.
VIDEO – BARANGAY CAPTAIN DOMINADOR MAGNO
