Natay ti maysa a lalaki kalpasan iti pannakalmesna iti Bantaoay River, Barangay Pudoc, San Vicente, Ilocos Sur idi kalman, May 20, 2026.
Ti biktima ket agtawen iti limapulo ket tallo, furniture maker nga agnaed idiay Barangay Pudoc, San Vicente.
Nakaawat ti San Vicente Municipal Police Station maipanggep ti napasamak a pannakalmes ti maysa a lalaki isu a nagrespondeda kadua dagiti kameng ti Municipal Disaster Risk Reduction and Management Office, Bureau of Fire Protection ken Rural Health Unit San Vicente.
Iti pakpaka-una nga imbestigasyon, immuna a nagturong ti biktima ken dua a kakaduana idiay Barangay San Sebastian iti nasao nga ili tapno makipiesta.
Ngem kalpasan iti pannaki-inninomda ket inkeddengda nga agawid babaen ti bamboo raft tapno dumalyasat iti karayan kas shortcut ngem bayat ti panagdalyasatda ket kellaat lattan a timpuak ti biktima isu nga impadas dagiti kakaduana nga alawen ngem gapu iti kauneg iti karayan ket nadanon ti mano nga oras sakbayda a narekubre ti biktima.
Iti baet a nagresponde dagiti kameng ti MDRRMO ken insayangkat ti cardiopulmonary resuscitation kalpasan a naalaw ket awan iti response iti biktima isu a naideklarar a natay babaen iti RHU wenno ken ni Dr. Amado Viesta Jr.
