Nangipaay ti Department of Social Welfare and Development (DSWD) ti tulong pinansyal kadagiti nakalasat ken kadagiti pamilia dagiti natay iti pannakalmed ti M/V Trisha Kerstin 3 idiay Basilan.
Segun ken ni DSWD Secretary Rex Gatchalian, nangited ti regional office iti Zamboanga Peninsula ti tulong pinansyal karaman ti panangipaay ti ready-to-eat food (RTEF) boxes para kadagiti pamilia a temporario nga agtaltalinaed idiay Isabela City Port.
Segun ti ahensia, 134 a nakalasat ti nakaawat ti medical assistance a P5, 000 ti tunggal maysa kabayatan a dua a pamilia a naminatayan ti nakaawat ti P10, 000 burial aid iti salinong ti Assistance to Individuals in Crisis Situation (AICS).
Agtultuloy met ti panangited ti psychosocial support ti ahensia ken nainget a pannakibinnulig kadagiti lokal a gobierno ti Basilan ken iti Philippine Coat Guard tapno masuportaran ti sitwasion ken masigurado ti agtultuloy a tulong para kadakuada. Reynand Fontejon
