Indepensar ti Department of Social Welfare and Development (DSWD) iti pangngeddengna nga ipaayan ti P80,000 a livelihood assistance ni Rose, ti babai a napicture-anna a rimmuar iti maysa a drainage.
Segun ken ni DSWD Spokesperson Irene Dumlao, karaman ni Rose kadagiti families and individuals in street situations (FISS) a nakita iti ahensya nga agkasapulan ti suportar.
Inlawlawagna a dagiti FISS ket awanan ti permanente a pagtaengan a kaaddoan kadakuada ket saan a benepisyaryo iti social protection programs iti gobierno a kas iti 4Ps.
Iti salinong ti Pag-abot Program a nairusat idi 2023, gagem ti gobierno a tulongan ti FISS a kas ken ni Rose ket umaboten iti talloribo a pamilia iti natulongan.
Sakbay a naited iti tulong ken ni Rose ket na-assess nga immuna iti kasasaadna.
Kinunana pay a ti P80,000 ket case-to-case basis laeng ket saan a maipaay iti amin ta depende iti kasapulan ken assessment dagiti social workers.
Agkolkolekta laeng ni Rose kadagiti recyclable a gamit ket napan laeng iti drainage tapno maala iti bassit a blade cutter nga araramatenna iti panagkolekta iti basura.
