Nasurok P220 milyon a cash assistance ti naipaayen ti Department of Social Welfare and Development (DSWD) iti nasurok 45, 000 a transport network companies drivers ken riders iti maudi a pay-out operations ti ahensia.
Segun iti DSWD, umabot iti 45, 522 ti benepisyaryo iti Metro Manila ti naikkan ti ayuda nga adda kabuklan a P227.61 milyon ti naipaay iti salinong ti Assistance to Individuals in Crisis Situation (AICS) program.
Kaadduan dagiti benepisyaryo manipud iti Grab pakairamanan ti Move It riders nga umabot iti 37, 344 ken immawat da ti kabuklan a P186.72 milyon nga ayuda.
Paset ti pay-out operations ti gobierno iti salinong ti Unified Package for Livelihoods, Industry, Food, and Transport wenno UPLIFT framework.
Segun ken ni DSWD spokesperson Assistant Secretary Irene Dumlao, nagbalin a nasayaat ken napardas ti distribution gapu ta naisayangkat daytoy iti tunggal kompania kern babaen ti tulong ken koordinasion dagiti TNC.
Nagyaman pay ti ahensia kadagiti kompania iti panagsapol ti mas accessible ken komportable a pay-out venues para kadagiti drivers ken riders da.
