Nadunor iti naduma-duma a paset ti bagi iti nagmaneho ti motorsiklo kalpasan a nadungpar iti van iti national highway idiay Barangay Ayudante, Candon City, Ilocos Sur iti oras ti 8:50PM idi May 3, 2025.
Ti nagmaneho iti Honda PCX motorcycle ket ni Leonardo Mico Anaten, agtawen iti tallopulo ket uppat, Project Development Officer, awanan ti driver’s license, nga agnaed idiay Barangay Pidpid, Sta. Cruz.
Ti nagmaneho met iti Toyota Innova ket ni Roberto Cayetano Lagutan, agtawen iti uppat a pulo ket tallo, naasawaan, Engineer, holder iti Driver’s License kaduana ti siam a miembro ti pamiliana nga agpapada nga agnaed idiay Montalban, Rizal.
Iti pannaki-uman ti Bombo Radyo Vigan ken ni PLt. Jovelyn Antalan iti Candon City Police Station, naggapu ti Innova iti bypass road a sumrek iti McArthur highway idinto a ti nakamotorsiklo ket agdaldalyasat iti national highway nga agpaamianan ket idi nadanonda iti nasao a lugar isun ti panagdinnungparda.
Segun ken ni Antalan, nakaru iti sinagaba a dunor ti nakamotorsiklo ta saan a nagaramat iti helmet ken nakai-nom idi napasamak iti aksidente isu a naipan iti Ilocos Sur Medical Center ngem naiyakar iti Ilocos Training and Regional Medical Center para iti naan-anay a pannakatamingna.
Dagiti met naglugan iti Innova ket saan a naan-ano ngem naipanda latta amin iti Candon City Hospital.
Kinuna ni Antalan a numan pay adda ti linya ti nakamotorsiklo idi napasamak iti aksidente ket napaspas iti panagpatarayna a mapapati a gapu iti impluwensyana iti arak.
Balakadna kadagiti amin nga agmanmaneho iti panagannad nangruna kadagiti turista a sanda a kabisado iti kalsada nga aginnayad laeng tapno awan iti maaksidente.
