Nakitaripnong ti Department of Transportation (DOTr) iti duapulo ket walo a kompania ti bus kasaruno iti aksidente idiay Subic-Clark-Tarlac Expressway (SCTEX) idi May 1, 2025 a nakatayan iti sangapulo a tattao ken nakadunoran iti tallopulo.
Iti taripnong ni Transportation Sec. Vince Dizon, napagpatangan ti isyu ti kinatalged ti kalsada ken panangbuwag iti illegal bus terminals.
Impaganetget ti secretary iti kinapateg ti naurnos a kasasaad dagiti bus ken salun-at dagiti driver sakbay nga agbiahe tapno masigurado iti kinatalged dagiti pasahero.
Dagiti karaman iti karambola idi naminsan ket tallo nga SUV, maysa a truck, ken pampasahero a bus a mapapati a naawanan ti preno.
Immunan a sinuspenso ti Land Transportation Franchising and Regulatory Board (LTFRB) ti operasyon iti sangapulo ket lima a unit iti Solid North Bus kasaruno iti napasamak nga aksidente.
