Nagpalagip ti Department of Migrant Workers (DMW) kadagiti overseas Filipino workers (OFW) idiay Hong Kong nga agannad kadagiti loan shark wenno kadagiti agpapautang nga adda nangato nga interest-na.
Segun ken ni DMW Secretary Hans Leo Cacdac, masansan a target dagiti loan sharks dagiti Pilipino a domestic helper.
Inlawlawagna a dakkel a gatad iti kuarta iti maididiaya kadagiti DH tapno mapautang ngem dakkel met iti interest-na ta umabot iti uppat a pulo a porsiento wenno nasursurok pay nu saanda a dagus a makabayad.
Kinuna ni Cacdac nga awan ti interest rate ceiling idiay Hong Kong a ti kayatna a sawen ket mabalinda a patawan iti 20, 30 wenno 40% ti interest loan isu a masapul nga agannad a nalaing dagiti Pilipino.
Malaksid iti nangato nga interest ket pangtaan, bugkawan ken pagsawsaw-an dagiti loan sharks dagiti dadduma nga OFW a marigatan nga agbayad.
