Nasayaaten ti kasasaad dagiti tallopulo ket walo a Filipino seafarer a naglugan iti cruise ship nga MV Hondius a naapektaran ti hantavirus outbreak kas pinasingkedan ti Department of Migrant Workers (DMW).
Maipalagip a naaddan dagiti kaso ti impeksyon ken pannakatay iti barko gapu iti hantavirus.
Sumagmamano kadagiti naglugan iti barko ket nagpositibo iti nasao a virus bayat nga agtultuloy iti imbestigasyon iti nagtaudan iti outbreak.
Segun ken ni DMW Secretary Hans Leo Cacdac, makikamkammayetdan iti akin-kukua iti barko ken manning agency tapno masigurado a natalged dagiti Pilipino a tripulante.
Agtultuloy pay iti monitoringda kadakuada bayat nga adda iti barko ken agtultuloy nga agtrabtrabaho.
Iti agdama ket saan pay nga ammo no makaawid dagiti Filipino seafarer ta kasapulan pay a dumalanda kadagiti medical clearance ken nainget ti health protocols sakbay a makasublida iti pagilian.
