Inatipa ti Bureau of Immigration (BI) ti maysa a 50-anyos a Pilipino iti Mactan-Cebu International Airport idi Oktubre 10 kalpasan a naduktalan nga agturong daytoy idiay Russia para iti trabaho kas K9 handler.
Naammuan iti imbestigasion a narekrut ti pasahero babaen ti social media ken maipagarup a naitukon ti binulan a sueldo a 3,500 US dollars.
Mapapati a binilin ti rekruter ti Pilipino nga agpammarang a turista ken ilemmengna ti pudno a panggep ti panagbiahe, a nangitunda iti pannakaikabilna iti kustodia ti Inter-Agency Council Against Trafficking (IACAT) para iti kanayonan nga imbestigasion.
Namakdaar ti BI kontra kadagiti mapagduaduaan a job offers iti ballasiw-taaw ken binalakadanda dagiti aplikante a siguraduenda a lehitimo ti recruitment ken kompleto dagiti dokumentoda babaen ti tulong ti Department of Migrant Workers (DMW).
