Inlawlawag ni Department of the Interior and Local Government (DILG) Secretary Jonvic Remulla nga awan pay iti opisyal a warrant of arrest manipod International Criminal Court (ICC) kontra ken ni Senator Bato dela Rosa.
Segun ken ni Remulla, agingga ita ket awan pay iti naawat a dokumento iti gobierno a mangpaneknek iti maibagbaga a bilin iti panagkemmeg.
Maikontra dayta iti immunan a sarita ni Ombudsman Jesus Crispin Remulla nga addan iti nairuar a warrant kontra iti senador.
Saanen a simrek iti Senado ni dela Rosa manipod naibaga ti mapapati a warrant no man pay agtultuloy iti pannakakita kenkuana iti social media ta nag-post iti sumagmamano a ladawanna.
Segun ti DILG, namonitor pay laeng ti senador iti agduduma a lugar iti pagilian idi napalabas a lawas.
Kabayatanna, nagkeded pay laeng nga agsarita ti abogado ni dela Rosa a ni Atty. Israelito Torreon.
