Kiniddaw ti kampo ni dati a Pres. Rodrigo Duterte iti International Criminal Court (ICC) a saan pay laeng a mangituding ti aldaw iti trial-na gapu ti mapapati a kumarkaru a sitwasyon ti salun-atna.
Impaganetget ni Peter Haynes a counsel ni Duterte a kasapulan pay a maadal ti “fitness to stand trial” ti dati a presidente sakbay a maituloy iti aniaman a panagdenggeg.
Segun ti depensa, kimmaru ti neurological condition ni Duterte a makaapektar iti memorya, reasoning ken kabaelana nga ag-concentrate a mabalin a makalapped iti aktibo a pannakipasetna iti trial.
No mapaneknekan a “fit to stand trial” ni Duterte ket kiniddawna iti depensa ti napapaut a panawen tapno makasagana ti trial.
Pinasingkedanda iti dadduma a kaso iti ICC nga umabot iti nasurok makatawen sakbay a nangrugi iti mismo a trial kalpasan a nakumpirmar dagiti kaso kontra iti akusado.
Kayat pay ti depensa a limitaran iti panagaramat ti video testimony ken written statements kas ebidensya ta napateg a personal a sumango ken agtestigo dagiti testigo tapno mapagtalinaed a patas ti trial.
