VIGAN CITY – Sangagasut ket uppat a tawen a pannakaibalud iti inyetnag ti Sandiganbayan a dusa ni dati a Sta. Catalina mayor Carlos Asuncion gapu iti mapapati a panangidonar na ti uppat a gasut a ribo a pisos ti maysa a non-government organization a ti naggapuan na ket ti tobacco excise tax collection iti ili.
Ti tallo pulo ket tallo a kabulong a desisyon a nairuwar idi kalman, naduktalan ti Sandiganbayan Fourth Division a guilty ni Asuncion ti walo a bilang iti kaso a graft ken uppat a bilang iti kaso a malversation of public funds.
Nasentensyaan ti dati a mayor ti innem agingga sangapulo a tawen iti kada bilang ti kaso na a graft ken innem a tawen met iti kada bilang iti kaso na a malversation agsipud ta saan a nakaipakita iti makanay nga ebidensiya tapnu mapaneknekan iti kina-inosente na.
Malaksid iti dayta, saan payen a mabalin nga agtugaw iti aniyaman a puwesto ti dati a mayor.
Dagiti pada na nga akusado a da Mamelfa Amongol, Rosita Ragunjan, Virginia Rafanan kenni Genoveva Ragasa ti Bayanihan ng Kababaihan ket nasentensyaan met laeng gapu kadagiti nasao a kaso ket agmuwelta da pay ti uppat a gasut a ribo a pisos a katukad iti ginastos da a kwarta.
Naduktalan a nagidonar ni Asuncion ti sangagasut a ribo a pisos iti Bayanihan iti mamin-uppat a daras idi 2012 kas panangsuporta na kadagiti livelihood projects da a ti naggapuan iti nasao a gatad ket iti municipal share manipud ti tobacco excise tax collections idi 2010 a saan met nga inaprubaran ti Sangguniang Bayan wennu awan iti budget ordinance a nangsuporta iti nasao a donasyon.
Napaneknekan pay a ti Bayanihan ket saan a mabalin nga umawat iti aniyaman a pinansyal a tulong agsipud ta saan met nga asosasyon wennu gunglo dagiti mannalon nga agmulmula ti tabako.
Ti agdama, al-alaen pay laeng ti Bombo Radyo Vigan iti reaksyon ti dati a mayor inaig iti nasao a banag.
