Naala ti 1.9 a gramo iti mapapati a shabu ken paltog iti maysa a High Value Individual iti naisayangkat a buy-bust operation iti ili ti Santiago, Ilocos Sur idi kalman, April 17, 2025.
Ti suspek ket maysa a lalaki, dati a drug surrenderee nga agnaed idiay Banayoyo, Ilocos Sur.
Iti pannaki-uman ti Bombo Radyo Vigan ken ni PCpt. Pete Soriano iti Santiago Municipal Police Station, insayangkatda iti buy-bust operation kontra ti suspek a nakaalaan ti mapapati a shabu nga aggatad iti P12,920 a naipan iti lima a piraso iti heat sealed transparent plastic sachets.
Segun ken ni Soriano, naala pay iti non-drug evidence a maysa a limagasut a pisos, tallo a sangaribo a nagserbi a boodle money, maysa a piraso iti cal. 38 revolver, innem a piraso ti live ammunitions para ti cal. 38 Special, maysa a piraso ti pocket weighing scale, maysa a piraso ti nangisit a belt bag, maysa a nangisit a Honda Click 125, ken sangapulo ket dua a piraso iti empty sachets.
Sangwen ti suspek ti kaso a panaglabsing ti Republic Act 9165 wenno Comprehensive Dangerous Drugs Act of 2002 ken Republic Act 10591 wenno Illegal Possession of Firearms and Ammunition kasta payen ti Omnibus Election Code kagiddan ti gun ban.
