Dinepensaran ni Kalookan Bishop Cardinal Pablo Virgilio David ni Fr. Flavie Villanueva iti sangsangwenna a pannakababalaw kalpasan nga inraman iti 18 ex-marines a mapapati a pinatulodanda iti maleta a naglaon iti kuarta.
Segun ti cardinal, agserserbi kadagiti marigrigat ni Fr. Flavie a nangisaguten iti biagna para iti dignidad iti tao.
Kinuna pay ni David a dati a presidente ti Catholic Bishops Conference of the Philippines, a nabayagen nga amammona ti nasao a padi ken nakitana mismo iti panagtulongna kadagiti marigrigat nangruna kadagiti biktima iti kinaranggas.
Makitinnulong pay ni Fr. Flavie iti Diocese of Kalookan tapno mangted ti psychosocial ken spiritual support kadagiti pamilia ti biktima iti extrajudicial killings iti salinong ti administrasyon ni dati a Pres. Rodrigo Duterte.
Kinuna pay ni David a saan a rumbeng a dadaelen ti nagan ti maysa a tao gapu laeng kadagiti awan pagibasaran nga akusasion ken kararagna nga agari iti kinapudno, panagbalin a patas ken kaadda ti due process.
Kinuna dagiti “maleta boys” nga indanonda dagiti kuarta iti maysa a simbaan iti SVD idiay Mindanao Avenue, Quezon City ngem naammoan nga awan iti kasta a nakapatakder iti nasao a lugar.
