Suportaran ti House prosecution panel ti panangisayangkat ti napaspas a Senate Impeachment trial ngem impaganetgetna a saan a rumbeng a mayaleng-aleng ti panangidatag ti kompleto nga ebidensia wenno due process.
Inaramid ni House prosecution spokesperson Atty. Benjamin Tolosa Jr. ken Lanao del Sur Rep. Zia Alonto Adiong ti panagsarita kasaruno iti kinuna ni Vice President Sara Duterte a kayatna a maaddaan iti napaspas nga impeachment proceedings.
Kinuna ni Tolosa nga awan ti makitkitada a parikot iti sarita ti bise presidente a kayatna a mapadaras ta kayatda amin a malpasen ti proseso iti kabiitan a panawen ngem saan a rumbeng a dardarasen ti oportunidad a maipresentar amin nga ebidensia a kasapulan.
Pinasingkedan met ni Adiong a saan nga agduma ti napaspas a trial ken karbengan dagiti partido a manggegan iti biangda.
Impanawagan manen dagiti dua nga agpampanday linteg ken ni Duterte a dumar-ay iti trial kalpasan a nagtestigo ti dati nga OVP special disbursing officer a ni Gina Acosta a binilin isuna ni Vice President nga i-turn over ti P125 million a cash ken ni security officer Col. Raymund Dante Lachica.
