Nagballaag ti Malakanyang kontra iti panagaramat kadagiti peke a testigo ken aramid a sarita iti imbestigasion iti flood control scandal, kasukat ti kuarta.
Dayta iti pinasingkedan ni Palace Press Officer Claire Castro Castro kalpasan nga imbabawi ti dati a security aide ni Zaldy Co a ni Orly Guteza ti immunan nga alegasionna kontra ken ni dati a House Speaker Martin Romualdez.
Segun ken ni Castro, saan a rumbeng nga aramaten dagiti testigo tapno mangdadael wenno mangpapigsa iti istorya kontra iti sabali a tao.
Kinunana a rumbeng nga agari ti pudno a sarita, ebidensia, linteg ken due process iti panangbigbig no siasino iti rumbeng a madusa iti flood control anomaly.
Awan met iti reaksyon ni Pres. Ferdinand Marcos Jr. iti panag-recant ni Guteza.
Nagpanawagan ti Malakanyang kadagiti addaan iti pudno nga impormasion nga agsarita ken makitinnulong iti imbestigasion ngem nagballaag kadagiti ar-aramid laeng a sarita ken ebidensia.
