Linagip ni Cardinal Pablo Virgilio David dagiti trahedya ken karit a sinango iti pagilian ita a tawen a rumbeng a pagadalan iti pudno a namnama.
Segun ken ni Cardinal David, saan a marikna dagiti Pilipino ti “Year of Hope” nga indeklarar ni dati a Pope Francis gapu iti nagsasaruno a krisis ken trahedya.
Dinakamatna pay dagiti mapukpukaw a mannadi, biktima iti drug war, anomalya iti flood control projects, nagsasaruno a didigra ken kimmaru a parikot iti online gambling.
Nadakamatna pay iti pasamak iti politika kas iti pannakakemmeg ken ni dati a Pres. Rodrigo Duterte, napaay nga impeachment ken ni Vice President Sara Duterte, panangatake ni Senador Imee Marcos ken ni President Ferdinand Marcos Jr. ken ti kontrobersyal a national budget.
Ngem kinunana nga iti baet ti saan a sigurado ken sipnget ket rumbeng a masarakan iti pudno a namnama.
Impalagipna pay iti publiko a ti namnama ket saan laeng a marikna no nasayaat dagiti bambanag no diketdi panangpili ti kinatibker iti baet iti rigat.
