Kinumpirmaran ni Assistant Ombudsman Mico Clavano nga opisyalen nga inawat ti Office of the Ombudsman ti partial committee report manipod opisina ni dati a Senate Blue Ribbon Committee Chairperson Panfilo “Ping” Lacson.
Ti report ket naglaon kadagiti resulta ti imbestigasyon mainaig iti maanomalya a flood control projects iti pagilian.
Segun ken ni Clavano, dagiti impormasyon a nakapauneg iti report ket insigida a maipasa kadagiti case team nga agig-iggem iti agduduma a flood control cases para iti nainget a panagadal ken mayannatup nga aksyon.
Ti kangrunaan a napasingkedan iti report dagiti nagan da Senador Francis Escudero, Joel Villanueva ken Jinggoy Estrada.
Nainaganan pay da dati a Senador Ramon “Bong” Revilla Jr., Leyte Rep. Martin Romualdez, ken dati a House Appropriations Committee Chair Rep. Elizaldy Co.
Inrekomendar ti komite nga idalan dagiti nasao a preliminary investigation, fact-finding investigation wenno case build-up gapu kadagiti posible a panaglabsing iti linteg kas ti direct bribery, anti-graft and corrupt practices ken plunder.
