Saan pay nga imbaba ti National Disaster Risk Reduction and Management Council (NDRRMC) ti Blue Alert Status uray pay nakaruaren ti Bagyo Isang iti pagilian.
Segun ken ni Office of Civil Defense (OCD) Spokesperson Junie Castillo, agtaltalinaed ti Blue alert status iti NDRRMC ken OCD gapu ti Low Pressure Area (LPA) nga adda iti uneg ti Philippine Area of Responsibility (PAR) karamanen ti epekto iti habagat.
Kayatna a sawen ket ad-adun ti duty officers a nakadeploy iti NDRRMC a mangtutok iti monitoring ken koordinasyon.
Karaman kadagiti napaawagan a tumulong iti operasyon ti nayon a kameng ti Armed Forces of the Philippines (AFP), Philippine National Police (PNP), Philippine Coast Guard (PCG) ken dadduma pay nga ahensya iti gobierno.
Nakasagana met dagiti rescue equipment’s ken dagiti family food packs.
Gagem ti addang a masigurado a napaspas ti panagtignay nu kas bilang kasapulan ti bayat ti madi a kasasaad iti panniempo.
