Inallukoy ni Parañaque 2nd District Rep. Brian Yamsuan ti Kongreso a padarasen ti gakat a Cybersecurity Act tapno masalakniban dagiti kritikal nga impormasyon iti pagilian ken papigsa iti depensa kontra kadagiti pangta iti internet.
Inruar ni Yamsuan ti panawagan kasaruno ti ballaag ti International Monetary Fund (IMF) maipanggep iti kumarkaru a lebel ti cyber attacks iti global financial system babaen ti Artificial Intelligence (AI).
Pinasingkedan pay ti Kongresista ti napasamak a data breach iti Canvas, maysa a Learning Management System nga ar-aramaten dagiti unibersidad iti pagilian, a nangibutaktak kadagiti pribado a rekord dagiti estudyante.
Segun ken ni Yamsuan, dagiti cycber attacks ket saan laeng a simple a panagtakaw kadagiti listaan para iti phishing, no diketdi dakkel a pangta iti national security ken kinatalged iti publiko.
Impakaaammo ti Armed Forces of the Philippines (AFP) nga agtultuloyda a sangsangwen dagiti cyber attack nga adda pakainaigan iti tensyon idiay West Philippine Sea.
