Umaboten iti tallopulo ket uppat dagiti natay gapu iti Bagyo Carina ken Habagat, kas maibasar iti umuna a record dagiti first responders ti Philippine National Police.
Sangapulo ket maysa a casualties ti naggapu iti National Capital Region (NCR), siam manipud Region 3, sangapulo ket dua manipud iti CALABARZON ken dua manipud Region 5.
Kadagiti natay, duapulo ket dua ti nalmes, innem ti nadaganan iti daga gapu ti landslide, lima ti nakuryente ken maysa ti natupakan iti kayo.
Nakairekord pay ti PNP ti sangapulo ket walo a nadundunor ken innem a mapukpukaw.
Inlawlawag met ni Philippine National Police Public Information Office Chief Pcol. Jean Fajardo, ti datosda ket maiberipika pay laeng ti National Disaster Risk Reduction and Management Council (NDRRMC) gapu ta basar iti kaudian a pattapatta ti ahensia, sangapulo ket uppat pay laeng ti nairekord a natay.
Kabayatanna, agtultuloy ti rescue ken relief efforts ti PNP iti Metro Manila, Ilocos Region, Central Luzon, CALABARZON ken Bicol.
