Sinigurado ni Department of Education Sec. Sonny Angara ti kanatalged ken nasayaat nga aglawlaw iti panagsubli ti face-to-face classes iti pagadalan idiay Tacloban.
Maipalagip nga idi June 22 ket dua nga estudyante ti nagpaltog iti uneg ti nasao a pagadalan a nakatayan iti tallo a tattao ken nakadunoran iti duapulo pay a sabali.
Segun ken ni Angara, saan a padarasen ti ahensya ti panaglaing dagiti naapektaran kagiddan ti panangipaganetgetna ti kinapateg ti panangbalanse ti panangituloy iti edukasyon ken proseso iti panagimbag.
Kinuna ti DepEd a nakompleton ti panangpapigsa ti seguridad iti pagadalan pakairamanan iti pannakaipan iti CCTV cameras, walk-through metal detectors, perimeter fencing ken masansan a panagpatrolya dagiti polis.
Nangisayangkat pay ti panagdalus ken panagpinta kadagiti pasilidad iti pagadalan idinto a nagbalinen nga opisina ti classroom a nakapasamakan iti insidente.
Makikamkammayet ti ahensia kadagiti lokal nga otoridad ken partner organizations tapno mapapigsa pay ti mental health ken learner protection systems.
