Idurduron ti Kongreso ti panang-nayon ti nasurok 2, 000 a guidance personnel kadagiti pampubliko a pagadalan inton 2027 kagiddan ti gakat nga P802 milyon a pondo tapno papigsaen ti mental health ken child protection services kadagiti estudyante.
Segun ken ni House Minority Leader Marcelino Libanan, nakaipalaon iti proposed P7.2 trilyon national budget para iti 2027 ti panagpataud ti 1,800 school counselor associate positions ken 221 school division counselor positions iti salinong ti Department of Education (DepEd).
Pinasingkedan ni Libanan a napateg ti nayon a counselling personnel kangrunaan iti baet dagiti report ti bullying, school violence ken dadduma pay a parikut a mabalin a maka-apekto iti emosional ken mental a kasasaad dagiti estudyante.
Para iti agpampanday linteg, saan a naan-anay ti physical security tapno mapagtalinaed ti kinatalged dagiti pagadalan.
Kinarit ni Libanan dagiti pribado nga elementary ken high school a nayonan dagiti counselling services gapu ta responsibilidad ti buo a komunidad ti kinatalged dagiti ubbing.
