Agtultuloy ti Anti-Money Laundering Council iti nainget nga imbestigasionda mainaig iti mapapati nga anomalya kadagiti flood control project idiay Bulacan.
Nangiruar ti Court of Appeals iti baro a freeze order kontra kadagiti bank account dagiti 2 a kontratista a kangrunaan a nakaala iti flood control projects para iti Bulacan a naduktalan a non-existence; maysa a mabigbigbig a negosiante ken dadduma pay a tattao ken entidad a napaneknekan a karaman iti panaglabsing iti Anti Graft and Corrupt Practices Act ken Malversation of Public Funds.
Sakup ti freeze order ti nalawa a sanikua, agraman dagiti 379 a bank account, 4 nga e-wallet account, 10 nga insurance policy, 9 a security account, 10 nga investment account ken 55 a real property.
Iti agdama, umabot iti P24.7 billion ti pakabuklan a gatad dagiti na-freeze nga asset, agraman dagiti bank account, insurance policies, lugan, real properties, e-wallet accounts, securities accounts ken investment accounts mainaig iti flood control scam.
