Ibilang ti Akbayan Partylist a panangbalewala iti Konstitusyon ken demokrasya ti pagilian ti desisyon ti Korte Suprema nga ideklarar nga ‘unconstitutional’ ti impeachment complaint kontra ken ni Vice President Sara Duterte.
Iti pannaki-uman ti Bombo Radyo Vigan ken ni Rep. Perci Cendaña, dakkel a trahedya para iti pagilian ti nagbalin a desisyon ta arigna pinukaw ti Korte Suprema ti separation of powers iti sangay ti gobierno tapno laeng salwadan ti bise presidente a nangabuso iti turayna ken nanggasto iti minilion a pisos a pondo ti pagilian, kasta payen ti panangpangtana ken ni Presidente Ferdinand Marcos Jr. ken iti pamiliana.
Mangnamnama ti Akbayan Partylist a takderan ti Senado ti prinsipyoda tapno mailaban ti impeachment complaint, ket mapreserba ti constitutional integrity ti pagilian.
Innayon ti kongresista nga idaydayawda ti Korte Suprema ngem saanda a mabalin nga awaten lattan ti panangbalewalada iti Konstitusyon.
Ti panangideklarar ti Korte Suprema ket gapu ta maibilang a panaglabsing iti one-year bar rule kas pinasingkedan ni SC Spokesperson Atty. Camille Ting.
Sangapulo ket tallo a mahistrado ti nagbotos a pabor iti deklarasyon, maysa ti nag-abstain ken maysa ti nak-’leave’.
Mabalinto latta ti agipila iti baro nga impeachment complaint kontra iti bise presidente inton Pebrero 6, 2026.
