VIGAN CITY- Nasarakanen dagiti miyembro ti Sta. Maria PNP ti lalaki nga agtawen iti sangapulo ket lima a mapapati a nangilibas iti motorsiklo a kukua ni Maricon Dar Gliam idiay Danuman West, Sta. Maria a natunton da laeng idi kalman, January 30 ngem mapatta-patta nga idi rabii ti January 29 agingga parbangon ti January 30 a napukaw.
Binagbagaan ni Police Senior Inspector Arcadio Viloria, hepe ti Sta. Maria PNP, ti nagannak ti suspek ken dagiti kakadua na nga agtawen iti sangapulo ket uppat, ket inbaga na a masapul a kitaen a naimbag dagiti nagannak dagiti annak da tapnu saan da a maisagmak.
Immuna iti dayta, ti motorsiklo ni Gliam a napukaw ket nakita da a naglulubbonan dagiti tallo a menor de edad ngem ti inpambar ti agtawen ti kinse nga isu iti maitudtudo a suspek iti pannakapukaw iti motorsiklo ket sinalda na iti maysa a natayan idiay Barangay Suso iti nasao met laeng nga ili.
Naamuan a ti suspek ket nagigiyan kada Gliam iti uneg iti dua a bulan ngem siguden a natangken iti ulo na.
