Kaso a Theft ken panaglabsing iti Republic Act 9165 wenno Comprehensive Dangerous Drugs Act of 2002 ti sangwen dagiti pito a miembro iti Salisi Gang a nakemmeg iti naisayangkat nga entrapment operation iti national Highway idiay Barangay Vacunero, Sto. Domingo itattay, May 16, 2026
Dagiti suspek ket agpapada a taga-Manila a nagturong laeng iti probinsia.
Iti pannaki-uman ti Bombo Radyo Vigan ken ni PLt. Roger Retreta a Deputy Chief of Police iti Sto. Domingo Municipal Police Station, apaman a naipakaammo kadakuada ti napasamak a panagtakawan iti Vigan City Public Market a nakakemmegan ti maysa a babai ket naisayangkat ti dragnet operation kadagiti mapapati a kakaduana a rason iti nakakemmeganda.
Segun ken ni Retreta, napaspas iti panagpataray ti van a nagluganan dagiti suspek ngem gapu ta adda iti sarsarunwenda a van ket immuna a napasardeng iti adda iti sangwananda.
No pay kasta idi nakita dagiti otoridad ti lugan dagiti suspek ket insigidada a pinababa dagiti suspek.
Naala kadakuada iti P648,000 a kuarta, $890, alahas nga aggatad iti P500,000 ken adu a cellphone, kasta payen a naala iti mapapati a shabu.
Pinasingkedan met ni PLt. Col David Dulnuan a hepe iti Vigan City Police Station a saanna a patien ti nakemmeg a suspek a babai iti panagtakawan iti Vigan City Public Market a nagderetso laeng iti Vigan manipod Manila gapu iti langana a kasla nakapangbalay laeng isu a pinaaminda agingga naibagana iti hotel a nag-check inanna ken dagiti kakaduana isu a tinurongda.
Kinunana a babaen iti CCTV footage ket nabigbig ti nagluganan a van dagiti dadduma pay a suspek isu a naipakaammo kadagiti otoridad iti dadduma a PNP stations iti probinsia.
Imbingay ni Duluan a ti modus dagiti suspek ket bayat nga adda agbaybayad iti barya a kaduada ket adda met iti agtaktakaw iti targetda.
Naammoan a saan laeng a ti siudad ti Vigan ti nangisayangkatanda iti panagtakawan iti tiendaan ta uray idiay Candon City, Ilocos Sur; Batac ken Badoc, Ilocos Norte; ken Balaoan, La Union ket adu iti tinakawanda.
Kabayatanna, kinuna ti maysa kadagiti biktima idiay Candon City a ni Ronaldo Mapili nga idi kawith-withdraw pay laeng ti asawana ket insigidadan a natakawan babaen iti pannakaala iti bag-da nga adda P6,000-P7,000 a kuartana, alahas ken passbook-na.
Iti panagreportda kadagiti otoridad ket nakita iti CCTV footage iti inaramid a panagtakaw dagiti suspek isu nga idi adda impormasyonda a nakemmeg dagiti suspek iti ili ti Sto. Domingo ket simmurotda ta kalikagumda a mapasubli dagiti natakaw kadakuada.
