Nasayaaten ti kasasaad dagiti agasawa a naglugan iti SUV kalpasan ti pannakatinnagda iti derraas idiay Sitio Baudan, Man-atong, Suyo, Ilocos Sur idi malem ti May 17.
Dagiti agasawa ket da Davis Hampoy Pulao, agtawen iti limapulo ket walo, naasawaan, driver ti nalabbaga nga Isuzu Hi-Lander; ken Charito Gallman Pulao, agtawen iti limapulo ket pito, naasawaan, MSWDO nga agpada nga agnaed idiay Barangay Boliwong Lagawem Ifugao.
Iti pannaki-uman ti Bombo Radyo Vigan ken ni PLt. Marinel Leonen manipod Suyo Municipal Police Station, agawiden idiay Ifugao dagiti agasawa ket agpapadayada a direksyon a sumang-at idin nagdungsa ti driver isu a nagderetsoda a natinnag iti deraas a sangagasut ket sangapulo a metro iti kababana.
Segun ken ni Leonen, ibilangda a milagro ti napasamak kadagiti agasawa ta adda laeng bassit a fracture-da iti baet ti kangato ti nakatinnaganda.
Gapu iti sinagaba dagiti dua ket naipanda iti Ilocos Sur District Hospital idiay Bio, Tagudin ngem naiyakar ti lalaki iti Ilocos Training and Regional Medical Center para iti naan-anay a pannakatamingna idinto a nakaruaren iti ospital ti babai.
Nagpalagip ni Leonen kadagiti motorista nga agannad tapno saan a maaksidente nangruna ita a pasaray agtudo ta nagalis iti dalan.
