Pinasingkedan ti ACT Teachers Partylist nga awan ti karbengan ni Vice President Sara Duterte a mangibaga a naudin iti Pilipinas nu yarig iti sabali a pagilian nu maipanggep iti edukasyon ta agtaltalinaed iti tradisyunal a papel ken lapis.
Iti pannaki-uman ti Bombo Radyo Vigan ken ni Rep. Antonio Tinio iti ACT Teachers Partylist, binabalawna ni VP Sara ta uray naikkan idi iti gundaway a mamagbaliw ken mangpasayaat koma iti Department of Education iti pagilian babaen ti panagbalinna a DepEd Secretary ket awan iti naaramidanna a pagsayaatan nu diketdi pinakaruna laeng iti kasasaad ti edukasyon.
Segun ken ni Tinio, ibilangna a “worst” DepEd secretary iti pakasaritaan ni VP Sara ken napuskol iti rupana nga agdillaw iti baet nga awan ti nasolbarna a parikot iti ahensya.
Kinunana nga iti uneg iti dua a tawen a panagtakem ti bise presidente kas DepEd secretary ngem nagbalin laeng a karamanb iti problema ket kimmaru ti learning crisis ta nagpokus iti confidential and intelligence fund nga awan ti pakainaigan iti ahensya, idi tawen 2023 ket 192 classroom laeng iti naipatakder iti baet a 6,000 classroom iti target ti DepEd, saan a nagbalin nga epektibo ti Mamatag Curriculum ta nagbalin pay nga overloaded iti trabaho dagiti mangisursuro ken impa-ikkatna dagiti visual aids kadagiti classroom a napateg para kadagiti ubbing nga agad-adal tapno napaspaspas iti panagsursuroda.
Singasingna nga imbes nga agdillaw ti bise presidente ket nasaysayaat koma nu idi nakatugaw iti puesto kas DepEd secretary ket nagsapul ti solusyon tapno mapasayaat ti panagadal dagiti estudyante ken saanda a paudi maipanggep ti edukasyon ken technolohia a kas iti dadduma a pagilian.
