Insanud ti Commission on Higher Education (CHED) agingga 2028 ti plano a panagkissay ti General Education (GE) units iti kolehio.
Dayta ket kalpasan a linapdan dagiti mangisursuro, estudyante, pagadalan ken dadduma pay a sektor ti gakat a panang-revise iti curriculum isu nga awan pay iti maipatungpal a panagbaliw iti general education curriculum para iti amin a programa ita nga school year.
Segun ken ni CHED Chairperson Shirley Agrupis, nagtulagan ti desisyon kalpasan ti taripnong ti CHED, Department of Education (DepEd), Teacher Education Council (TEC), ken EDCOM II.
Maysa kadagiti kangrunaan a kwinestyon iti agduduma a sektor ti plano a kissayan ti agdama a 36-unit General Education curriculum a pagbalinen a sangapulo ket walo a units.
Nagballaag dagiti kritiko a posible a bumaba ti kalidad ti tertiary education kangrunaan iti posible a panangikkat kadagiti asignatura a Filipino ken Literature.
