Papigsaen ti Department of Education (DepEd) ken Commission on Higher Education (CHED) ti suporta iti mental health kadagiti agad-adal babaen iti panangted ti scholarship grants dagiti guidance counselor ken guidance associate kadagiti pagadalan ditoy pagilian kalpasan dagiti insidente iti kinaranggas.
Segun ken ni Education Secretary Sonny Angara, karaman kadagiti addang ket ti LINGAP wenno Learning Initiatives for Nurturing Guidance Associates and counselors ti CHED.
Iti nasao nga programa, adda ti 800 nga scholarship grants a nakasagana a maited kadagiti guidance counselor ken guidance associate iti pagilian.
Saan a bumaba iti 200 scholars ti agdama nga karaman iti programa.
Inawis ni Angara ti sibubukel a kumunidad, karaman dagiti nagannak a makikaysa iti pannangtarabay kadagiti ubbing tapno masalwadanda kontra iti madi nga impluwensia, aglalo kadagiti aktibidad iti online.
