Umabot iti 67,504 nga estudyante ti target a masuportaran iti scholarship programs ti Department of Science and Technology (DOST) inton 2027 iti salinong ti gakat nga P8.67 billion a pondo iti proposed national budget.
Nangatngato dayta iti 2,407 scholars wenno 3.70% kumparar iti 65,097 a benepisyaryo a napondoan iti salinong ti 2026 General Appropriations Act kas pinasingkedan ti Department of Budget and Management.
Iti pakabuklan a pondo, P7.55 billion ti nakailatang para iti DOST-Science Education Institute (SEI) a mangidadaulo iti undergraduate ken graduate scholarships ken specialized training programs.
Kabayatanna, P1.12 billion ti nailatang para ti Philippine Science High School System (PSHSS) a mangmangted ti specialized secondary education iti science, technology, engineering ken mathematics wenno STEM.
Segun ken ni DBM Acting Secretary Kim Robert de Leon, gagem iti nangatngato a pondo nga yatiddog ti oportunidad kadagiti agtutubo a Pilipino a makaadal iti STEM fields ken maka-contribute iti agriculture, health, disaster resilience, digital transformation ken dadduma pay a sektor.
