Inkari ni Presidente Ferdinand Marcos Jr. ti nalawlawa a suporta ti gobierno kadagiti lokal a manufacturer babaen ti panagpuonan iti robotics ken moderno a teknolohia.
Naipakita iti presidente ti panagusar ti robotics iti panagpataud kadagiti paset para kadagiti kotse, motorsiklo, trak, eroplano, heavy machinery ken dyip iti Nuvali Steel Processing Center Inc. sadiay Biñan, Laguna.
Inyunay-unay ni Presidente Marcos a makatulong ti lokal a produksion dagiti high-specification parts a mangkissay iti imports manipud iti ballasiw-taaw, mataginayon ti added value dagiti produkto iti Pilipinas ken mangpataud iti ad-adu a panggedan.
Kabayatanna, segun ken ni Department of Science and Technology (DOST) Secretary Renato Solidum Jr. nga imbes a kissayan dagiti trabahador, makatulong ti robotics a mangpaadu iti workforce ti pasilidad manipud 71 agingga iti 241 nga empleado gapu ta kasapulan pay laeng ti tao tapno mapaandar ti sumagmamano nga automated systems.
