Pinasingkedan ni dati a Cong. Mike Defensor nga adda nayon a sangapulo ket pito a “Maleta Boys” ti nakasagana nga agparang ken agtestigo maipanggep ti flood control scandal.
Malaksid pay dayta iti duapulo ket dua nga indibidual nga immunan a nagpakita ken nagpayam-ammo a dati a bodyguard ni dati a Cong. Zaldy Co ken nag-deliver iti male-maleta a kuarta iti sumagmamano a politiko.
Segun ken ni Defensor, dagiti baro a testigo ket adda personal nga ammoda kadagiti cash delivery a naisayangkat idi.
Impaganetgetna a mapapati nga umaboten iti 52 maleta iti maysa a cash delivery, a tunggal maysa ket naglaon iti P50 million wenno katukad iti P2.5 billion iti maysa a biahe.
Inallukoy ni Defensor iti Senado kangrunaan ti Blue Ribbon Committee nga ituloy iti imbestigasyon tapno mabigbig no pagtataudan ken pakaipapanan dagiti mapapati a kuarta nga adda iti likodan ti flood control scam.
