Nagkedked nga agkomento ti Malakanyang iti pannakawaya-waya ni dati DPWH Secretary Manuel Bonoan mainaig iti pannakiraman na iti flood control scam.
Segun ken ni Palace Press Officer Atty. Claire Castro, awan ti mensahe ni Presidente Ferdinand Marcos Jr. iti panagruar iti pagbaludan ni Bonoan uray iti posibilidad a panagbalin na nga state witness kontra kadagiti nakasoan a karaman iti korapsion.
Pinasingkedan ni Castro a saan a sakop ti ehekutibo dagiti ar-aramiden ti Ombudsman iti panangdusa kadagiti karaman iti korapsion.
Ti laeng kayat ni presidente Marcos ket suroten ti proseso ken linteg para tapno madusa dagiti nanggundaway iti kuwarta dagiti Pilipino.
Ni Bonoan ket pinaruar ti Fifth division ti Sandiganbayan ken naikkat kas co-accused iti kaso a plunder ni senador Jinggoy Estrada ken dadduma pay nga opisial a maipagarup a karaman iti irregularidad iti flood control projects.
