Umabot iti P361 milyon ti naipaay nga emergency assistance ti Department of Social Welfare and Development (DSWD) iti nasurok 14, 000 a Pilipino iti salinong ti Assistance to Individuals in Crisis Situation (AICS) program ita a bulan.
Segun ti Crisis Intervention Program, adda kabuklan a P361,119,371 ti naipaay kadagiti 14,738 benepisyaryo a tinulungan ti Crisis Intervention Unit satellite office idiay Commonwealth Avenue, Quezon City.
Segun ken ni DSWD Assistant Secretary Irene Dumlao, agtultuloy ti nangato a kasapulan para iti tulong ti gobierno ken adda sumagmamano a benepisyaryo a manipud ti iruar ti Metro Manila.
Kadakkelan a naipaay ti medical assistance nga adda 12 857 nga indibidwal ti nagunggonaan ken nasurok P347 milyon a gatad ti naited.
Pinasingkedan ni Dumlao a mabalin nga umasideg iti DSWD Crisis Intervention Units, SWAD offices, ken satellite offices dagiti agkasapulan ti dagus a tulong.
