Impakaammo ti Department of Social Welfare and Development (DSWD) a nakaituding iti panagiwarasda iti cash aids para kadagiti benepisyaryo iti fuel subsidy babaen laeng ti e-wallet transfers kalpasan a natay ti maysa a rider bayat a nakapila iti maysa a payout center idiay Quezon City.
Segun ken ni DSWD Secretary Rex Gatchalian, maisayangkat ti distribusyon para kadagiti sumarsaruno a payouts ken maideretson kadagiti e-wallet dagiti transport network vehicle service (TNVS) ken motorcycle taxi riders a karaman iti listaan dagiti otorisado a makaawat ti nasao a subsidiya.
Inlawlawag met ni Gatchalian a dagiti listaan dagiti nagan ket maibasar iti maipasa iti Land Transportation Franchising and Regulatory Board (LTFRB) nga ayan iti lehitimo a drivers.
Personal a nagturong ken nakipagladingit ti secretary iti pamilia ti natay a rider ken nangidanon ti tulong babaen ti medical ken burial assistance ken dadduma pay a kasapulan iti napanawan a pamiliana.
