Mapalag-an ti danag dagiti masikog iti panaggastos iti panaganakda kalpasan nga impangato ti Philippine Health Insurance Corporation (PHILHEALTH) ti benepisyo iti panaganak.
Iti panagsarita ni President Ferdinand Marcos Jr., impakaammona a nalawlawan ken nangat-ngaton ti maternity benefits iti PhilHealth.
Manipod inton April 30, ti normal a panaganak iti ospital, ti bayadan ti PhilHealth ket P29,000 manipod iti dati a P9,750; para iti cesarean section, manipod P37,000 ket agbalinen a P58,000 agingga P62,000 iti bayadan ti PhilHealth.
No iti ward iti panaganakan uray pribado nga ospital ket posible nga awan iti bayadan inton makaruar.
Ammo ti presidente a nangina iti gastos iti panaganak ket no agkurang ti gastos ken mapilitan nga agtiped ket agresulta iti peggad.
Kinuna pay ni Marcos a nayatiddog pay ti prenatal care a manipod koma ti check-up ket agbalinen a walo iti sungbatan ti PhilHealth, karamanen dagiti bakuna ken laboratory tests ken tallo a follow-up visits.
Impaganetget ti presidente a gagem ti gobierno a masigurado a tunggal aganak ket natalged ken saan a madanagan iti pagbayadda iti ospital ken awan iti agpeggad a biag gapu iti pagkurangan iti gastos.
