Nagpanawagan ni Parañaque 2nd District Brian Raymund Yamsuan iti pribado a sektor a makipaset ken tumulong iti panagtignay iti nakaru a pagkurangan iti classroom iti pagilian.
Segun ken ni Yamsuan, umabot iti 145,000 ti agdama ti pagkurangan iti classroom ket posible a kumaru pay ta mapatta-patta a 51,000 a pasdek ti pampubliko a pagadalan ti saan a natalged nga aramaten inton 2028.
Idurduron ni Yamsuan ti gakat a House Bill 7362 wenno Classroom-Building Acceleration Program (CAP) Act.
Ti salinong iti nasao a gakat ket mapalubosan ken allukoyen dagiti civil society organizations (CSOs) ken pribado a grupo a makipaset ti panagpatakder kadagiti pagadalan babaen ti nadardaras a proseso iti procurement, accounting ken auditing.
Ipalubos pay ti gakat dagiti kualipikado a local government units (LGUs) a mangiduron ken mangipatungpal ti classroom projects babaen ti pondo ti national government.
Segun ken ni Yamsuan, saan a kabaelan a masolusyonan ti gobierno laeng ti nasao a parikot isu a kasapulan ti “whole-of-nation approach”.
Ti CAP Act ket karaman dagiti prayoridad a gakat ti Legislative-Executive Development Advisory Council (LEDAC) nga inaprubaran ni Pres. Ferdinand Marcos Jr.
