Immatangan ni President Ferdinand Marcos Jr. ti pormal a pannakairusat ti Implementing Rules and Regulations (IRR) ti Expanded Tertiary Education Equivalency and Accredited Program (ETEEAP) iti Commission on Higher Education (CHED).
Gagem ti programa a maikkan ti gundaway dagiti working professional a makaala ti college degree kas maibasar iti kapadasan ken kabaelanda uray saan a nakaadal iti kolehio.
Iti salinong ti dayta, mabalin a makaala ti natukad a credits dagiti aplikante nga adda nasurok lima a tawen a work experience-na ken nakapasa ti comprehensive competency assessment.
Marukod ti KSAV wenno knowledge, skills, attitudes ken values a naala ti non-formal learning, informal training, ken relevant work experience.
Segun ken ni Pres. Marcos, dakkel a banag dayta kadagiti Pilipino a nasirib, nadiskarte ken determinado ngem saan a nakaleppas iti kolehio ta masapul nga agtrabaho para ti pamilia.
Kinuna ni Pres. Marcos a ti pagrukodan ti laing ket saan laeng a maala iti pagadalan nu diketdi ti kabaelan a sangwen ti pudno a karit iti biag tapno matungpal iti arapaap.
Ipaspasigurado ni Pres. Marcos iti CHED a naurnos ken epektibo ti pannakaipatungpal ti ETEEAP Act ken siguradoen a pakairanudan dagiti Pilipino.
