Umaboten iti nasurok P1.2 billion ti tulong ti gobierno kadagiti mannalon ken mangngalap a naapektaran iti bagyo Crising ken habagat, segun iti Department of Agriculture.
Karaman ti ₱545.56 million a gatad ti bin-i ti irik, mais ken nateng, ₱400 million manipud iti ACPC SURE loan program nga agingga ₱25,000 kada benepisyaryo, ken ₱268 million indemnity manipud iti crop insurance para kadagiti 46,000 a mannalon.
Umabot iti 10,595 metric tons ti nadadael iti agrikultura katukad iti ₱323.15 million, a nangapektar kadagiti 14,772 a mannalon ken mangngalap.
Kadakkelan ti nadadael iti pagay a 6,703 metric tons nga aggatad iti ₱212.6 million sarunwen ti high-value crops a ₱82.63 million, mais a ₱22.13 million, dingwen ken manok a ₱5.33 million, fisheries a ₱44,950 ken dadduma pay.
