Impangta ni US Pres. Donald Trump a leppasen ti Amerika iti panangsuportar iti Iraq no mangabak manen ni dati a Prime Minister Nouri al-Maliki.
Idi January 27 ket nakaituding koma a mangisayangkat ti panagpipili iti presidente ti parliament iti Iraq ngem nariribok iti panagpipili kalpasan a saan a nagkinaawatan ti presidential candidate.
Ni Maliki ket adda koneksyonna iti Iran, ti pinili ti alliance of Shia-led parties a nominee tapno agbalin a prime minister.
Ngem nagballaag ni Trump a kamali a pilien ni Maliki ta idi napalabas a panagidaulona ket mapapati a naigamer iti rigat ken kimmaru a gimmulo idiay Iraq.
Maipalagip a nagakem ni Maliki a Prime Minister iti Iraq iti nagbaetan iti 2006 ken 2014 a namarkaan ti sectarian violence ken bimmaba iti puesto kalpasan a sinakup iti Islamic State ti dakkel a paset iti pagilian.
