Maysa a truck mixer iti nagbaliktad ken natinnag iti nasurok-kumurang 20 feet a derraas iti asideg iti waig idiay Sitio Lipit, Barangay Urzadan, Suyo, Ilocos Sur itay ala una dies iti malem (April 15, 2025) a gappuanan iti pannakadunor ti nagmaneho.
Ti driver ti truck ket ni Romar Marayag Elaydo, agtawen iti duapulo ket walo nga agnaed idiay Barangay Cappa-cappa, San Esteban.
Iti pannaki-uman ti Bombo Radyo Vigan ken ni PCpt. Godofredo Ribuyaco manipod Suyo Municipal Police Station, bayat ti panagsang-at ti lugan ket kellaat a nagpangato iti sango a paset ti lugan gapu iti nadagsen a kargana a mixed cement isu a nagbaliktad ket natinnag iti derraas.
Nagsagaba ti minor injuries ti driver isu a naipaagas idiay Bio, Tagudin Hospital babaen kadagiti nagresponde a Rural Health Unit personnel nga ita ket natalgeden iti kasasaadna.
Saan pay laeng a naala ti nasao a truck mixer gapu iti kababa iti nakatinnaganna isu a saan pay nga ammo nu mano ti gatad dagiti nadadael a paset ti lugan.
Inlawlawag ni Ribuyaco a saan a delikado a paset ti nasao a kalsada a nakapasamakan ti aksidente ta umuna a gundaway laeng a pasamak dayta.
VIDEO – PCPT. GODOFREDO RIBUYACO
